Economy, Interview, Model Watch, Slider » डेसच्याम्प प्रशिक्षकमा कायमै रहने

असार २८, २०७३- फ्रान्सेली फुटबल टिमको प्रशिक्षकमा डिडियर डेसच्याम्प कायमै रहने भएका छन् । युरो २०१६ को फाइनलमा पोर्चुगलसँग पराजित भएयता डेसच्याम्पले आफ्नो अबको योजना सन् २०१८ को विश्वकप रहेको सोमबार बताए । फ्रान्सेली फुटबलको इतिहासमा खेलाडी र प्रशिक्षक दुवै भूमिकामा महान् बन्ने अवसरबाट नजिकले चुकेका डेसच्याम्पले भने, ‘हामी वास्तवमै कति निराश छौं भनेर बयान गरेर साध्य छैन । हामी उपाधिको नजिक पुगेर पनि चुक्यौं ।’

फ्रान्समै भएको विश्वकपमा टिम विजयी रहँदा कप्तान रहेका ४७ वर्षीय डेसच्याम्पको प्रशिक्षकको अनुबन्ध रुसमा हुने सन् २०१८ को विश्वकपसम्म कायम रहेको छ ।

‘मेरो अनुबन्ध त्यतिसम्मका लागि छ र म आफ्नो विकल्पबारे सोच्ने पक्षमा छैन,’ उनले भने, ‘सबैभन्दा पहिला हामी कसरी फाइनलमा पराजित रह्यौं भन्ने विश्लेषण आवश्यक छ । अब खेलाडी क्लब फुटबलमा व्यस्त हुनेछन् । म योजना बुन्नमा तल्लीन हुनेछु । अबको दुई वर्षमा हाम्रो ध्यान केन्द्रित हुनुपर्छ ।’

उनले आफ्ना खेलाडी हारमा निराश भएपछि नयाँ पुस्ताका फ्रान्सेली खेलाडीबाट धेरै आस गर्न सकिने बताए । उनले प्रतियोगितामा सर्वाधिक गोल गर्ने एन्टोनी ग्रिजम्यानसँगै अन्य खेलाडीको प्रदर्शनमा सुधार हुने विश्वास पनि पोखे । ‘दुई वर्ष अगाडिको स्थिति तुलना गर्ने हो भने अहिले राम्रो भएको छ । त्यस विश्वकपको खराब प्रदर्शनपछि अहिले हामी युरोको फाइनल पुगेका छौं । हाम्रा खेलाडीले युरोमा जसरी खेल खेले, त्यसमा मलाई गर्व छ ।’